संस्थापन इतरका नेता डा. शेखर कोइरालालाई वरिष्ठ नेता बनाउन युवा तथा खेलकुदमन्त्री डिगबहादुर लिम्बुले सभपाति शेरबहादुर देउवासँग आग्रह गरेका छन् ।

मोरङका जिल्ला सभापति समेत रहेका लिम्बुले भने, ‘हिजो चुनाव तपाईले गिरीजाप्रसाद कोइरालासँग लड्नुभयो । वरिष्ठ नेता प्राप्त गर्नुभयो । अहिले डा. शेखर कोइरालाले किन प्राप्त नगर्ने ?’

पार्टीका मन्त्रीहरुले मन्त्रालयगत जानकारी दिनका लागि बैठकमा डाकिएका लिम्बुले विगतको अवस्था ख्याल गर्दै कोइरालालाई वरिष्ठ नेता बनाउन माग गरेका हुन् ।

यसअघि केन्द्रीय समिति बैठकमा नै गोपालमान श्रेष्ठलाई वरिष्ठ नेता बनाउन केन्द्रीय सदस्य चन्द्रबहादुर केसीले माग गरेका थिए । १४ औं महाधिवेशन अघि देउवासँग सभापतिमा पराजित रामचन्द्र पौडेल वरिष्ठ नेता थिए ।

पार्टी केन्द्रीय कार्यालयमा छुट्टै कार्यकक्ष बनेपनि कोइरालालाई वरिष्ठ नेताको उपाधी दिइएको छैन । कांग्रेसको विधानमा वरिष्ठ नेताको व्यवस्था भने छैन ।