नेकपा माओवादी केन्द्रका उपमहासचिव वर्षमान पुनले अबका निर्वाचनहरूमा देश बाहिरका नेपाली निर्णायक हुने बताएका छन् । पार्टी मुख्यालय कोटेश्वर पेरिसडाँडामा उनले बुधबार पार्टीको उपत्यका विशेष प्रदेशको जिम्मेवारी सम्हाल्ने क्रममा आयोजित कार्यक्रममा प्रविधिको उच्चतम विकास र प्रयोगका कारण विदेशमा बसेका नागरिकको हैसियत मुलुकभित्रको राजनीतिक समीकरण नै बदल्न सक्ने अवस्था आएको बताएका हुन् ।

‘आजको युग प्रविधिको हो । पहिला जसरी मानिसका घरघरमा गएर सङ्गठन बनाउने र विचार राख्ने अवस्था अब नरहन सक्छ’, पुनले भने, ‘प्रविधिका कारण अबका निर्वाचनहरूमा देशभित्रका भन्दा विभिन्न सिलसिलामा देश बाहिर रहेका नेपालीहरू निर्णायक हुने जस्तो देखिएको छ ।’ पुनले वैचारिक बहसको थलो पनि ‘डायस्पोरा’ नै हुन थालेको उल्लेख गर्दै पार्टी सदस्यदेखि सबै कमिटीका नेता कार्यकर्तालाई आफ्ना एजेण्डाबारे सामाजिक सञ्जालबाट बहस सञ्चालन गर्न निर्देशनसमेत दिए ।