भक्तपुरमा पार्किङ गरेर राखिएको एउटा बसमा आगजनी भएको छ। बिहीबार बिहान ३ बजेर १० मिनेटमा मध्यपुरथिमि नगरपालिका–४ चारदोबाटो चोक नजिक सडक छेउमा पार्किङ गरि राखेको बा ४ ख ६६६९ नम्बरको बसमा आगजनी गरिएको हो। 

जिल्ला प्रहरी परिसर भक्तपुरले उक्त बसमा आगजनी भएको खबर पाउनासाथ प्रहरी वृत्त थिमीबाट खटिएको टोलीले दमकलको सहायतामा बिहान साढे ३ बजेतिर आगो नियन्त्रणमा लिएको जनाएको छ। 

कमलविनायक रत्नपार्क चल्ने उक्त बसमा कसले आगजनी गर्यो खुलेको छैन।

जिल्ला प्रहरी परिसर भक्तपुरका प्रवक्ता वसन्त पाठकले प्रहरी वृत्त थिमिको टोली र जुद्ध बारुणयन्त्र भक्तपुरको सहयोगमा बसमा लागेको आगो निभाइएको जानकारी दिए।

प्रहरीले घटनाबारे अनुसन्धान सुरु गरिएको जनाएको छ।