संविधानसभा अध्यक्ष एवं नेकपा एमालेका उपाध्यक्ष सुवासचन्द्र नेम्वाङप्रति प्रधानमन्त्री पुष्पकमल दाहाल ‘प्रचण्ड’ले श्रद्धाञ्जली अर्पण गरेका छन् ।

एमाले पार्टी कार्यालय च्यासल पुगेर ‘प्रचण्ड’ले नेम्वाङको पार्थिव शरीरमा पुष्पगुच्छासहित श्रद्धासुमन व्यक्त गरेका हुन् ।

नेकपा माओवादी केन्द्रका उपाध्यक्ष तथा गृहमन्त्री नारायणकाजी श्रेष्ठ, उपाध्यक्ष अग्निप्रसाद सापकोटा, महासचिव देव गुरुङलगायतका नेता कार्यकर्ता श्रद्धासुमन व्यक्त गर्न एमाले पार्टी कार्यालय च्यासल पुगेका छन् ।

कांग्रेस सभापति शेरबहादुर देउवा, नेकपा एकीकृत समाजवादीका अध्यक्ष माधव नेपाल, सम्मानित नेता झलनाथ खनाल, उपाध्यक्ष राजेन्द्र पाण्डे, नेसपा अध्यक्ष डा. बाबुराम भट्टराई, नेकपा महासचिव नेत्रविक्रम चन्द ‘विप्लव’, राप्रपा नेता पशुपतिशमशेर जबरालगायत शीर्ष नेता पनि च्यासल पुगेर श्रद्धाञ्जली दिए ।

मंगलबार राति १ बजे निधन भएका नेम्वाङको पार्थिव शरीर श्रद्धाञ्जलीका लागि एमाले केन्द्रीय कार्यालय च्यासमा राखिएको छ । एमालेका शीर्ष नेता कार्यकर्ता, शुभेच्छुकहरु पनि श्रद्धाञ्जलिका लागि पार्टी कार्यालय पुगेका छन्।