११ किलो दोलखामा बरामद गरेको सुन प्रकरणमा प्रहरीले थप एक जना चिनियाँ नागरिक पक्राउ गरेको छ। बुधबार दिउँसो चीनको सिचुवान घर भई काठमाडौं महानगरपालिका-१५ स्वयम्भू किमडोल बस्ने चिनियाँ नागरिक तासी दावा भन्ने ६६ वर्षका आगर लामा पक्राउ परेकाे हुन् ।

प्रहरीको प्रारम्भिक अनुसन्धानबाट यो सुन तस्करी गरेको घटनामा सुन अर्डर गर्नेदेखि ल्याउन लगाउने सम्मको भूमिका तासीले खेल्ने गरेको खुलेको छ। 

मंगलबार मात्रै सिआइबीको टोलीले काठमाडौंबाटै एक जना चिनियाँ नागरिकसहित ३ जनालाई पक्राउ गरेको थियो। त्यसअघि नै प्रहरीले दोलखाबाट ७ जनालाई पक्राउ गरेको थियो। 

यस प्रकरणमा अहिलेसम्म ११ जना पक्राउ परेका छन्।