प्रधानमन्त्री पुष्पकमल दाहाल ‘प्रचण्ड’ ले इजरायलको बंकरमा रहेका नेपाली विद्यार्थीसँग कुराकानी गरेका छन् ।  प्रधानमन्त्री ‘प्रचण्ड’ ले मन्त्रिपरिषद्को कार्यालयबाट इजरायलको बंकरमा रहेका नेपाली विद्यार्थी विपीन सुवेदीसँग संवाद गरेका हुन् ।

प्रधानमन्त्रीका स्वकीय सचिव रमेश मल्लका अनुसार प्रधानमन्त्री ‘प्रचण्ड’ ले नेपाली विद्यार्थीलाई शीघ्र उद्धार गरिने र त्यसका लागि सरकार लागिपरेकाले नआत्तिन आग्रह गरेका छन् । 

प्रधानमन्त्री ‘प्रचण्ड’ ले सरकार पछिल्लो तीन दिनदेखि नेपाली विद्यार्थीको उद्धारमा लागिपरेको र आजै मन्त्रिपरिषद्को बैठक बोलाइएको, सर्वदलीय बैठकमा समेत सोही विषयमा छलफल हुने बताएका छन् । प्रधानमन्त्री ‘प्रचण्ड’ ले परराष्ट्रमन्त्रीस्तरमा पनि कुराकानी भएको र इजरायली दूतावाससँग पनि यसबारेमा नियमित छलफल भइरहेको उल्लेख गरेका थिए । उनले यी सबै कुरा त्यहाँका अरु विद्यार्थीलाई पनि सञ्चार गरिदिन आग्रह गरेका थिए ।