त्रिदेशीय टी-२० सिरिजको फाइनलमा नेपालले युएईविरूद्ध ब्याटिङ गर्दै छ । कीर्तिपुरस्थित त्रिवि क्रिकेट मैदानमा सुरू भएकाे खेलमा टस जितेको युएईले फिल्डिङ रोजेपछि नेपालले पहिले ब्याटिङ गर्ने भएको हो ।

जारी प्रतियोगितामा नेपाल अपराजित हुँदै फाइनल पुगेको हो भने युएईले हङकङलाई रन रेटको आधारमा पछि पार्दै फाइनलमा नेपालसँगको भेट पक्का गरेको हो ।

गत सोमबार मुलपानी क्रिकेट मैदानमा भएको खेलमा नेपालले युएईलाई ५ विकेटले हराएको थियो । यस्तै कात्तिक १ गते भएको पहिलो खेलमा पनि नेपालले युएईमाथि ७ विकेटको शानदार जित हात पारेको थियो ।

सिरिजको चार वटै खेलमा जित हात पारेको नेपालले दुई खेलमा युएई र दुई खेलमा हङकङलाई हराएको थियो ।