भूकम्पप्रभावित क्षेत्रका जनतालाई नबिल बैंकले राहत सामग्री उपलब्ध गराएको छ ।

बैंकले प्रभावित क्षेत्रका जनताको उद्धार तथा राहतका लागि एक करोड रुपैयाँबराबरको राहत सामग्री वितरण गर्ने निर्णय गरेको हो । जिल्ला विपद् व्यवस्थापन समिति जाजरकोटद्वारा सञ्चालित एकद्वार राहत संकलन र वितरण केन्द्रलाई बैंकको प्रतिनिधित्व गर्दै प्रमुख बजार अधिकृत कृष्ण सुवेदीले सहायक प्रमुख जिल्ला अधिकारी हरिश्चन्द्र शर्मालाई पहिलो चरणको राहत हस्तान्तरण गरेका छन् ।

प्रमुख कार्यकारी अधिकृत ज्ञानेन्द्रप्रसाद ढुंगानाका अनुसार बैंकले खाद्यान्न, त्रिपाल, ब्लाङ्केट, औषधिलगायतका एक करोड बराबरको राहत सामाग्री उपलब्ध गराउने भएको छ । उनले भने ,‘हामीले भूकम्प प्रभावित क्षेत्रका जनताको घाउमा मलम लगाउन सहयोग पुगोस् भनेर यो राहत उपलब्ध गराएका हौँ, यो हाम्रो सामाजिक उत्तरदायित्व पनि हो ।’ उनले जाजरकोट र रूकुम पश्चिम दुवै क्षेत्रमा राहत सामग्री उपलब्ध गराउने जानकारी दिए ।

राहत सामग्री बोकेर नबिल बैंकको प्रतिनिधित्व गर्दै प्रमुख बजार अधिकृत सुवेदी तथा रारा क्लस्टर प्रमुख तपेन्द्र कुँवर जाजरकोट पुगेका थिए ।

नबिल बैंकले सामाजिक उत्तरदायित्वअन्तर्गत विभिन्न समयमा भइरहेको दैवी प्रकोप पीडितलाई राहत उपलब्ध गराउँदै आएको छ ।

शुक्रबार मध्यरातमा जाजरकोटलाई केन्द्र बनाएर ६.४ म्याग्निच्युडको भूकम्प जाँदा पश्चिम नेपालमा ठूलो जनधनको क्षति भएको थियो । नबिल बैंकको प्रभावित क्षेत्रका जनतालाई सहयोग गर्ने आकस्मिक निर्णयसँगै राहत उपलब्ध गराइएको हो ।