चारदेशीय महिला टी-२० सिरिजकोअन्तर्गत दोस्रो खेल आज नेपालले हङकङसित खेल्दैछ । उक्त खेल नेपाली समय अनुसार बिहान ११:४५ बजे सुरु हुनेछ । नेपाल पहिलो खेलमा बुधबार तान्जानियासित २७ रनले पराजित भएको हुनाले नेपाललाई आजको खेल जित्नैपर्ने दबाबमा छ ।

आजको खेल जितेमा हङकङले उपाधि भिडन्त पक्का गर्नेछ । हङकङ भने पहिलो खेलमा जापानसित विजयी भएको थियो ।

हङकङमा जारी सिरिजमा आयोजक हङकङसँगै नेपाल, तान्जानिया र जापान सहभागी छन् ।

आइसिसी वरीयतामा तान्जानिया १९औँ स्थानमा छ भने नेपाल २१औँ स्थानमा छ । यस्तै, वरीयतामा हङकङ २२औँ तथा जापान ५१औँ स्थानमा रहेको छ । नेपालले समूह चरणको अन्तिम खेल आगामी मंसिर २ गते जापानसित खेल्नेछ । शीर्ष दुई टोलीले उपाधिका लागि खेल्नेछन् ।

नेपाली महिला क्रिकेट टोलीको प्रशिक्षकमा मनोज कटुवाल रहेका छन् भने टोलीमा कप्तान इन्दु बर्मा, उपकप्तान विन्दु रावल, रुविना क्षेत्री, सीता रानामगर, अस्मिना कर्माचार्य, काजोल श्रेष्ठ, कञ्चन श्रेष्ठ, खुसी डंगाेल, संगीता राई, सोनी पाख्रिन, सोमु विष्ट, पूजा महतो, रोमा थापा र सम्झना खड्का छन् ।