काभ्रेपलान्चोकमा एक  घरमा आगलागी हुँदा ९ लाख बराबर क्षति भएको छ । धुलिखेल नगरपालिका वडा नम्बर ११ बानियाँछाप निवासी बलराम धितालको ढुङ्गा माटोले बनेको ३ तले घरमा १२ गते बिहान ३:५० बजे अचानक आगलागी हुँदा घरसहित नजिकैको जस्ताले बारेर बनाइएको गाई गोठ समेत जलेर नष्ट भएको जिल्ला प्रहरी कार्यालय काभ्रेले जानकारी दिएको छ ।

आगलागीबाट पिठो पिस्ने मेसिन १ थान ,हाते टेक्टर १ थान,भुसा काट्ने मेसिन १थान ,मकै ७० मुरी,तोरी ३ मुरी,गँहु ३ मुरी,धान २ मुरी,जैँ घाँस १ मुरी, कपडा, खाध्यन्न, भाडाँकुँडा, पराल, घर र सँगै रहेको गाईगोठ समेत  गरी जम्मा रू. ९,०००००।–(नौ लाख) बराबरको क्षति भएको जिल्ला प्रहरी कार्यालय काभ्रेले जनाएको छ ।

प्रहरी, स्थानीय र धुलिखेल नगरपालिकाको दमकलको सहयोगमा ६:५० बजे नियन्त्रणमा लिइएको उक्त आगलागीको कारण भने खुल्न सकेको छैन । प्रहरीको अनुसार, आगलागीबाट मान्छे र पशुचौपायलाई कुनै क्षति पुगेको छैन ।