पोखरामा जारी केपी ओली कप टी-२० क्रिकेट प्रतियोगितामा बागमती प्रदेशलाई ४ विकेटले हराउँदै त्रिभुवन आर्मी क्लब फाइनलमा प्रवेश गरेको छ । पोखरा रंगशालास्थित क्रिकेट मैदानमा बागमती प्रदेशले दिएको १ सय २८ रनको लक्ष्य पछ्याएको आर्मीले १५ ओभरमा ६ विकेट गुमाएर पूरा गर्‍यो ।

आर्मीका लागि भीम शार्कीले ३९ रन बनाए । उनले ३५ बलमा ४ चौका प्रहार गरे । कुशल मल्लले ८ बलमा ४ छक्का प्रहार गर्दै २७ रन बनाए । कप्तान विनोद भण्डारीले भने १२ बलमा ३ चौका र २ छक्का प्रहार गर्दै २५ रन बनाए । सोमपाल कामी १५ रनमा अविजित रहे ।

बागमतीको लागि सन्दीप लामिछानेले २ तथा ऋत गौतम, सोनु देवकोटा, ईशान पान्डे र प्रतिस जीसीले १–१ विकेट लिए ।

पहिले ब्याटिङ गरेको बागमतीले पूरै ओभर खेलेर ७ विकेटको क्षतिमा १२७ रन बनायो । बागमतीको लागि प्रतिक श्रेष्ठले ३५ बलमा ३ चौका र ४ छक्का प्रहार गर्दै ५० रनमा अविजित रहे । कप्तान सन्दीप लामिछानेले २२ बलमा २ चौका र १ छक्का हान्दैँ १९ रन बनाए । आर्मीको लागि भने शाहब आलमले ४, सोमपाल कामीले २, तथा विवेक यादवले १ विकेट लिए ।

आर्मीले उपाधिका लागि मधेश प्रदेश र सशस्त्र प्रहरी बल (एपीएफ) बीचको विजेतासँग खेल्नेछ । फाइनल खेल शुक्रबार हुनेछ ।