फिफा विश्वकप–२०२६ छनोटको दोस्रो चरणमा नेपाली राष्ट्रिय टिमले आज बहराइनसँग खेल्दैछ । खेल बहराइनको राष्ट्रिय स्टेडियममा बहराइनको स्थानीय समय अनुसार राति १० बजे (नेपाली समय राति १२ः४५ बजे) सुरु हुनेछ ।

यो खेल नेपालमै हुने तालिका थियो । तर, एकमात्र अन्तर्राष्ट्रिय दशरथ रंगशालाको मैदान खराब भएपछि एसियाली फुटबल महासंघले खेल सञ्चालन हुन नसक्ने निर्णय गरेपछि बहराइनमा हुने भएको हो ।

नेपालले बहराइनसँगको अवे म्याच अर्को साता बहराइनमै खेल्नेछ ।

समूह ‘एच’ मा रहेको नेपालले सुरुवाती दुई खेल गुमाइसकेको छ । नेपाल पहिलो खेलमा युएईसँग ४–० गोल र दोस्रो खेलमा यमनसँग २–० गोलले पराजित भएको थियो । नेपाल पहिलो चरणमा लाओसलाई पराजित गर्दै दोस्रो चरणमा पुगेको थियो ।