बाँकेमा रहेको एक जडीबुटी प्रशोधन केन्द्र बाहुबली हर्बल उद्योगमा आगलागी भएको छ । जिल्लाको जानकी गाउँपालिका वडा नं ६, पिप्रहवास्थित हर्बल उद्योगमा आगलागी भएको हो । 

हर्बल उद्योग प्रालिको परिसरमा राखिएका सल्लाको खोटो तथा दाउरामा आगलागी भएको जिल्ला प्रहरी कार्यालय बाँकेले जानकारी दिएको छ । बिहीबार बिहान ७ बजेतिरकाे समयमा विद्युत् सर्ट भएर आगलागी सुरु भएको प्रहरी कार्यालयले जनाएको छ ।

आगलागीबाट मानवीय क्षति नभएको प्रहरी बताएकाे छ ।

नेपालगन्ज विमानस्थलको दमकललगायत बाँकेका विभिन्न पालिकाका गरी ६ वटा, जिल्ला प्रहरीको वाटर क्यानल, बर्दियाका विभिन्न स्थानीय पालिकाका ३ वटा, रुपैडिहा भारतको एक गरी ११ वटा दमकलबाट आगलागी नियन्त्रणको प्रयास भइरहेको जिल्ला प्रशासन कार्यालय बाकेले जानकारी दिएको छ । 

आगो निभाउन नेपाल प्रहरी, सशस्त्र प्रहरी र नेपाली सेनाको टोली खटिएको छ ।