त्रिभुवन अन्तर्राष्ट्रिय विमानस्थलमा आज आधा घण्टा उडान तथा अवतरण बन्द गरिने भएको छ ।

त्रिभुवन अन्तर्राष्ट्रिय विमानस्थल नागरिक उड्डयन कार्यालयद्वारा जारी सूचना अनुसार विमानस्थल सङ्कटकालीन योजना अनुसार गरिने विभिन्न अभ्यासहरू मध्ये Alert 9.3.1 ( विमानस्थलमा विमान दुर्घटना ) सम्बन्धी पूर्णकालीन अभ्यासका लागि बन्द गर्न लागिएको हो ।

दिउँसो १ देखि साढे १ बजेसम्म विमानस्थल बन्द हुने सार्वजनिक सूचनामार्फत् जानकारी गराइएको छ । 

विमानस्थल वरिपरिको आकाशमा धुवा साथै दमकल, सुरक्षाकर्मी र एम्बुलेन्स तथा अन्य गतिविधिको अभ्यास गरिने बताइएको छ । विमानस्थल संकटकालीन योजनाको अभ्यास गरिनुपर्ने अन्तर्राष्ट्रिय नागरिक उड्ड्यन संगठनको मापदण्ड र एयरपोर्ट इमजेन्सी प्लानअनुसार उक्त कार्य गर्न लागिएको हो ।