पोखरामा विद्यार्थी बोकेको स्कुल बस दुर्घटना भएको छ ।

सोमबार बिहान पोखरा-२१ कृस्तीमा एलपी देवकोटा मेमोरियल विद्यालयको बस विद्यार्थीसहित दुर्घटना भएको हो । दुर्घटना हुँदा दुई जनाको मृत्यु भएको छ भने २० जना घाइते भएका छन् ।

मृत्यु हुनेमा बसकी सहचालक ३३ वर्षकी आरती विक र सोही स्कुलमा पढ्ने उनको छोरा ५ वर्षका प्रिन्स विकको मृत्यु भएको हो । दुवै जनाको गण्डकी मेडिकल कलेजमा उपचार भैरहेको थियो ।

मट्टिखानबाट विद्यार्थी लिएर स्कुलतर्फ फर्कंदै गरेको ग १ क ६२१९ नम्बरको बस दुर्घटना भएको हो । उक्त बसमा चालक, सहचालक र विद्यार्थी गरी २२ जना सवार थिए ।

उनीहरुको पोखरा स्वास्थ्य विज्ञान प्रतिष्ठान, गण्डकी मेडिकल कलेज र मणिपाल शिक्षण अस्पतालमा उपचार भइरहेको छ ।