विश्वकप लिग-२ क्रिकेटअन्तर्गत क्यानडामा भइरहेको शृंखलाको आफ्नो अन्तिम खेलमा नेपालले मंगलबार ओमानसँग खेल्दै छ । खेल नेपाली समयअनुसार राती ८:४५ बजेदेखि सुरु हुनेछ ।

नेपालले जारी शृंखलामा खेलेका तीनवटै खेलमा हार ब्यहोरेको छ । पहिलो खेलमा क्यानडासँग एक सय ३ रनले पराजित भएको नेपाल दोस्रो खेलमा ओमानसँग एक विकेटले पराजित भएको थियो । तेस्रो खेलमा क्यानडासँग ५ विकेटले हारेको हो ।

विश्वकप लिग-२ मा नेपालले ५ खेलयता लगातार हार ब्यहोरेको छ ।

विश्वकप लिग-२ मा नेपालले ९ वटा त्रिदेशीय शृंखला खेल्ने छ । हरेक शृंखलामा तीनवटा देश हुन्छन् भने शृंखलामा एउटा देशसँग दुईवटा खेल खेल्नुपर्छ । नेपाल अहिले ७ खेलबाट २ अंक जोडेर तालिकाको सातौँ स्थानमा छ ।

आठौँ तथा अन्तिम स्थानमा रहेको यूएईको ५ खेलबाट २ अंक छ । ओमानको ६ खेलमा ५ अंक छ भने क्यानडा ११ खेलमा १४ अंक जोडेर शीर्षस्थानमा छ ।

क्यानडालगत्तै नेपाल विश्वकप लिग-२ को शृंखला खेल्न अमेरिका जानेछ ।