नेपाली बजारमा आज (बुधबार) सुनको मूल्यले पुनः नयाँ रेकर्ड कायम गर्न सफल भएको छ । गत बुधबारदेखि नयाँ रेकर्ड बनाइरहेको सुनको मूल्यले यस दिन पनि निरन्तरता दिएको हो ।

लगातार सातौँ दिन पनि सुनको मूल्यले ऐतिहासिक रेकर्ड बनाएको हो ।

मंगलबार प्रतितोला १ लाख ६५ हजार ९०० रुपैयाँ कायम भएको सुन सुनचाँदी व्यवसायी महासंघका अनुसार आज सुन प्रतितोला एक लाख ६६ हजार सात सय रूपैयाँमा कारोबार भइरहेको छ ।

महासंघका अनुसार मंगलबारको तुलनामा बुधबार छापावाल सुनको मूल्य तोलामा ८०० रुपैयाँ बढेको छ । 

यसैगरी, बुधबार चाँदीको मूल्य पनि अघिल्लो दिनको तुलनामा बढेको छ ।

यस दिन चाँदीको मूल्य प्रतितोला दुई हजार एक सय ३५ रूपैयाँ पुगेको नेपाल सुनचाँदी व्यवसायी महासंघले जानकारी दिएको छ । मंगलबार चाँदी प्रतितोला दुई हजार एक सय रूपैयाँमा कारोबार भएको थियो । 

यो मूल्य अघिल्लो दिनको तुलनामा प्रतितोला ३५ रूपैयाँ बढेको हो ।

अन्तर्राष्ट्रिय बजारमा आज सुन प्रतिऔंस २७ सय ५१ अमेरिकी डलरमा कारोबार भइरहेको छ ।