प्रधानमन्त्री केपी शर्मा ओली चीन भ्रमणमा जाने भएपछि संसदीय समितिले बैठक आह्वान गरेको छ । 

प्रतिनिधिसभा अन्तर्गतको अन्तर्राष्ट्रिय सम्बन्ध र पर्यटन समितिको बैठक मंसिर २ गते आइतबार सिंहदरबार स्थित समितिको सभाकक्षमा बस्ने गरी बोलाइएको हो ।

बैठकमा प्रधानमन्त्रीको विदेश भ्रमणको विषयमा छलफल गर्नेगरी कार्यसूची तय गरिएको संघीय संसद सचिवालयले जनाएको छ । 

बैठकमा प्रधानमन्त्री ओली र परराष्ट्रमन्त्री आरजु राणालाई समेत बोलाउने समितिको तयारी छ ।

चिनियाँ राष्ट्रपति सी जिङपिङको औपचारिक निमन्त्रणामा प्रधानमन्त्री ओली आगामी मंसिर १७ (२, डिसेम्बर)  गते चीनको राजधानी बेइजिङ जान लागेका हुन् ।