• राजन घिमिरे 
   

नेपालमा राम्रै चर्चा र उपस्थिति जनाई रहेको चलचित्र फुलबारी अब अष्ट्रेलियाका बिभिन्न शहरहरूमा प्रदर्शन हुने भएको छ । यो चलचित्रलाई अष्ट्रेलियाको बिभिन्न शहरहरूमा नेपोज एजुकेसन एण्ड भिसा सर्भिसेस र एस पिपुल एण्ड भिसा सर्भिसेसले प्रदर्शन गर्न लागेको हो ।

यसै क्रममा चलचित्र फुलबारीले फ्रेबुअरी २५ र २६ तारेखका दिन सिड्नीको बैक्स टाउनमा रहेको होयत्स सिनेमा हलबाट प्रदर्शनको शुरूवात गर्ने भएको छ ।‘ यो शोहरू पछि हामी फुलबारीको  अन्य शोहरू पुरा अष्ट्रेलिया प्रदर्शन गर्दै अगाडि बढाउदै छौं ।‘ यो चलचित्रका अष्ट्रेलिया बितरक रोशन भट्टराई र बिनोद पौडेलले जानकारी दिए । चलचित्र फुलबारी १९ फ्रेबुअरीका दिन क्यानभरा ,२० र २२ फ्रेबुअरीका दिन डार्बिन र यसैगरी एडिलेट र मेलबर्नमा फ्रेबुअरी २२ का दिन प्रदर्शन हुने भएको छ । यसपछि फुलबारी तास्मनिया ,ब्रिसबेन र पर्थमा पनि प्रदर्शनमा आउने तयारीमा रहेको छ ।
 

पारिवारिक पिडामा हाँस्य रस मिसिएको चलचित्र फूलबारी साँच्चै निर्देशक रामबाबु गुरूंगले निकै राम्रो चलचित्र बनाएका छन् । नेपालमा पारिवारिक दर्शकहरू तानेको यो चलचित्रले बिदेशिएका नेपाली यूबा यूबती र नेपालमा रहेका परिवारको मर्मलाई निकै संबेदनशिल तरिकाले प्रस्तुत गरेको छ । चलचित्रले समातेको सशक्त धार र बलियो पाटोले के देश के बिदेश ? सबै खाले दर्शकहरूलाई आकर्षित गर्ने देखिन्छ । 

 चलचित्र कबड्डी मार्फत नेपाली दर्शकहरू माझ गहिरो छाप छोड्न सफल निर्देशक रामबाबु गुरूंगले आफ्नो त्यो बलियो र उच्च क्षमता अनि प्रतिभालाई चलचित्र फुलबारीमा पनि उपस्थिति गराएका छन । कथा र पात्रको सशक्त प्रस्तुति यो चलचित्रको अर्को बलियो पाटो हो ।