•   राजन घिमिरे 

 यतिबेला सफल कलाकारहरूको उपस्थिति र सम्बादका कारण चलचित्र जारी चर्चामा छ । ठेट नेपाली शब्द र अर्गानीक नेपाली कथा अनि परिबेशका कारण चर्चामा आएको चलचित्र जारीले नेपालमा मात्र होइन कि बिदेशमा पनि आफ्नो साख र वाहवाही बढाइरहेको छ ।

यसैबीच बैशाख १ गते नयाँ बर्षदेखी प्रदर्शनमा आउन लागेको यो चलचित्रले अष्ट्रेलियाको बिभिन्न शहरहरूमा पनि आफ्नो प्रदर्शनको यात्रा अगाडि बढाउने भएको छ । नेपाली चलचित्रको  अष्ट्रेलियामा राम्रो बजार बनाउन सफल भएका रोशन भट्टराई समूहले नै चलचित्र जारीको अष्ट्रेलियामा प्रदर्शनको चाँजो पाँजो मिलाएको हो ।‘ यतिबेला चलचित्रको बजार गरम पारिरहेको यो चलचित्रलाई हाम्रो समूहले अष्ट्रेलिया ल्याएको हो । यहाँ रहनु हुने नेपाली चलचित्र मन पराउंनु हुने नेपालीहरूको मागलाई ध्यानमा राखेर यो चलचित्रलाई हामीले  अष्ट्रेलिया भित्र्याएका हौं ।‘ भट्टराईले भने ।

चलचित्र जारी एप्रिल १६ र १७ तारेख सिड्नीको अर्बनमा रहेको रिडिंग सिनेमा हलमा प्रदर्शन हुने भएको छ । यसै गरी यो चलचित्र अष्ट्रेलियाको राजधानी क्यानभेरामा एप्रिल १८,२१ र २३ तारेखका दिन प्रदर्शन हुने बताइएको छ । यो चलचित्रको नेपालीहरूको नयाँ बर्षको अबसर पारेर बैशाख महिनाको पहिलो  हप्तादेखी अष्ट्रेलियाका अन्य शहरहरू मेलबर्न, ब्रिसवेन, एडिलेड, पर्थ, डार्विन र तास्मानियामा पनि क्रमश प्रदर्शन गर्दै लैजाने तयारी भैरहेको छ । चलचित्र जारीको सिड्नी शोको तयारी भने एस पिपुल एजुकेसन एण्ड भिसा सर्भिसेस र नेपोज ऐजुकेसन भिसा सर्भिसले गरेको हो ।